Maeght Unibertsoa

Abenduaren 2an, Chillida Lekuk Maeght Unibertsoa irekiko du, Eduardo Chillidaren lanen eta Aimé Maeght arte-merkatari historikoarekin eta bere emazte Margueriterekin batera lan egin zuten artista batzuen arteko elkarrizketa proposatzen duen erakusketa. Hala, Georges Braque, Alexander Calder, Alberto Giacometti, Pablo Palazuelo, Julio González, Jean Arp, Barbara Hepworth, Antoni Tàpies, Joan Miró edo Marc Chagall-en lan esanguratsuenetako batzuk izango dira museoan ikusgai. Fondation Marguerite et Aimé Maeght-ekin eta Eduardo Chillida – Pilar Belzunce Fundazioarekin batera antolatu da erakusketa, eta Saint-Paul-de-Vence-ko Maeght fundazioaren omenez sortu.

Eduardo Chillidak — Maeghtek bultzatutako sortzaile taldeko artista gazteenetako bat zen eta galeristak "Mon petit" ezizena jarri zion — konfiantzazko eta adiskidetzako harremana izan zuen Maeghtekin; 30 urte inguru iraun zuen, Maeght hil zen arte. Zalantzarik gabe, galeristak modu erabakigarrian lagundu zuen Chillidaren irudia bultzatzen, artista, bohemio eta sortzaileak sarri joaten ziren espazio hartan sorkuntza-une apartak partekatzeko aukera emanda.